Стартавала выдавецкая ініцыятва «33 кнігі для іншай Беларусі»

У швейцарскім выдавецтве «DIAPHANES» выйшла кніга, якую «Галіяфы» рыхтавалі ў Мінску цягам некалькіх гадоў яшчэ да свайго закрыцця — зборнік «НЕТУТЭЙШЫЯ: REVERSION. Беларуская эксперыментальная драматургія («ТВЛ», «Бум-Бам-Літ»)».

Кнігу ўжо можна спампаваць бясплатна на сайце выдавецтва. Цягам месяца з’явіцца і друкаваная версія, і гэта будзе вялікі фаліянт фарматам 205×290 см і аб’ёмам 580 старонак, паведаміў Budzma.org літаратар, мастак і кнігавыдавец Зміцер Вішнёў.

Гэтая кніга аднаўляе «страчаныя» старонкі развіцця беларускай эксперыментальнай драматургіі — «няздзейснены праект пакалення» 1990–2000-х гадоў (С. Кавалëў). Анталогія змяшчае п’есы Ігара Сідарука, Лявона Вольскага, Змітра Вішнёва, Іллі Сіна, Марка Ледэтэда, Сержа Мінскевіча, Віктара Жыбуля, Юрася Барысевіча, Алеся Туровіча, Ягора Конева, А. Часа (Барыса Пятровіча), Віталя Пятроўскага, Івушкі Панінай, Вольгі Гапеевай, Ганны Ціханавай, Джэці, Алеся Бычкоўскага, Віталя Воранава, Віктара Лупасіна (Ыванова), Адама Шостака, Усевалада Гарачкі, Васіля Дранько-Майсюка, а таксама прадмовы Алены Лепешавай і Пятро Васючэнкі, маніфесты «Бум-Бам-Літа», хроніку перформансаў і тэатральных пастановак эксперыментальных п’ес, спіс літаратуры па тэме.

Анталогія драматургіі займела шыкоўны дызайн дзякуючы Маргарыце Сяньковай. І, вядома, праекта не было б без выдавецкай ініцыятывы «33 кнігі для іншай Беларусі», якую заснавалі Ірына Герасімовіч, Сільвія Засэ і Лукас Бэрфус. Анталогія выйшла ў серыі «МЫСЛІЦЬ МАСТАЦТВА» Інстытута тэорыі Цюрыхскай вышэйшай школы мастацтваў і Цэнтра мастацтваў і тэорыі культуры Цюрыхскага ўніверсітэта.