Міжнародны кангрэс даследчыкаў Беларусі пачаў працу ў Коўне

Каля 400 навукоўцаў з усяго свету, якія цікавяцца тэмай Беларусі, сабраліся на адмысловым Кангрэсе ў Коўне. На ІІІ Міжнародным кангрэсе даследчыкаў Беларусі працуе 14 секцыяў. Тэмы самыя шырокія – эканаміка, палітыка, гісторыя, культура.

Усё больш сусветных навукоўцаў цікавяцца нашым форумам, – кажа адзін з арганізатараў, палітолаг Андрэй Казакевіч.

- Цікавасць да Форуму расце. Расце геаграфія ўдзельнікаў. Расце і прафесійны ўзровень. Расце цікавасць розных акадэмічных інстытуцый, як унутры краіны, так і за мяжой. Можна казаць пра тое, што ў выніку працы Кангрэса паўстаюць новыя супольнасці, паўстаюць новыя ідэі, праекты. І нельга сказаць, што Кангрэс – гэта толькі тое, што адбываецца тут гэтыя тры дні. Гэта таксама праца ў той ці іншай форме, якая доўжыцца на працягу ўсяго года.

Форум праходзіць ужо трэці раз і, паводле арганізатараў, становіцца традыцыйным.

Улад Грынеўскі, Беларускае Радыё Рацыя