Новы выдавецкі праект Фонда Kamunikat.org - кніга «Янка Запруднік» з сэрыі «Людзі эміграцыі»

Укладальнікі кнігі Натальля Гардзіенка, Надзея Запруднік, Валянціна Трыгубовіч і Лявон Юрэвіч. Выданьне змяшчае матэрыялы пра самога Янку Запрудніка (біяграфічны нарыс, успаміны дачкі Веры, сяброў і знаёмых), а таксама яго ўласныя тэксты. 

У разьдзеле “Дасьледаваньні” прадстаўленыя некаторыя часткі з дысэртацыі Янкі Запрудніка й ягоныя дасьледчыя артыкулы. Частка “Скрыпты” рэпрэзэнтуе паасобныя прыклады ягонай журналісцкай дзейнасьці на радыё “Вызваленьне / Свабода”, разьдзел “Эсэ” — найбольш важныя эсэістычныя тэксты гісторыка. 

Асобна ў кнізе зьмешчаныя вершы, прысьвячэньні, эпітафіі, што выходзілі з-пад пяра Сяргея Ясеня (літаратурны псэўдонім Янкі Запрудніка), а таксама інтэрвію зь дзеячам. Шмат распавядаюць пра самога Янку Запрудніка й ягонае атачэньне дзёньнік падарожжа ў ЗША у 1953 г. і разнастайныя ўспаміны самога героя кнігі. 

Асабліва багаты разьдзел — эпісталярыі, які складае ліставаньне з Прэзыдэнтам БНР Міколам Абрамчыкам, літаратуразнаўцам і гісторыкам Антонам Адамовічам, сябрамі, сваякамі й знаёмымі як у Беларусі, гэтай і ў эміграцыі. Адмыслова для гэтай кнігі было запісанае ўжо пасьля сьмерці Янкі Запрудніка інтэрвію зь ягонай жонкай спадарыняй Надзеяй. Завяршае кнігу абшырная бібліяграфія гісторыка й журналіста. 

Янка Запруднік быў першым, хто данаціў на Беларускую Інтэрнэт Бібліятэку Kamunikat.org. І першыя 10 замоўцаў кнігі "Янка Запруднік" на Kamunikat.shop атрымаюць у дадатак да гэтай кнігі 10 асобнікаў кнігі Янкі Запрудніка "Дванаццатка".  

Янка Запруднік (Сяргей Вільчыцкі, 1926—2022) — гісторык, журналіст, выдавец, ведамы дзеяч беларускай дыяспары ў ЗША. Паходзіў з мястэчка Мір (цяпер Карэліцкі раён Гарадзенскай вобласьці).