У Берліне адбудзецца прэзентацыя кнігі беларускіх перакладаў украінскага аўтара Юркі Іздрыка

Кніга выйшла ў выдавецтве Hochroth Minsk.

Перакладчыкі — Алесь Плотка і Наталля Русецкая.

Юры Іздрык (нар. 1962) — украінскі пісьменнік, мастак, музыкант, культуролаг. Выбітны прадстаўнік украінскага постмадэрнізму. Лаўрэат шэрагу прэмій, у тым ліку Нацыянальнай прэміі Украіны імя Тараса Шаўчэнкі (2025). Заснавальнік легендарнага літаратурнага часопіса «Четвер». Аўтар вядомых раманаў «Воццех» (1996) і «АМTM» (2004) і інш., а таксама вершаў, аднолькава папулярных як у анлайн-публікацыях, так і ў кніжных выданнях. Творы перакладаліся на беларускую мову, асобнай кнігай выйшаў паэтычны зборнік «Папяросы» (2020).

«Папярэдняя кніга Іздрыка па-беларуску, „Папяросы“, даўно стала рарытэтам, — каментуе перакладчык і ўкладальнік кнігі Алесь Плотка. — Частка была вывезеная і адразу распрадалася, частка была рэпрэсаваная разам з іншымі кнігамі выдавецтва „Галіяфы“.

Ідэя новага выдання лунала ў паветры, але Шаўчэнкаўка стала добрай нагодай, каб праект завяршыць. Дзякуючы суперзладжанай працы ўсёй каманды цяпер мы маем не толькі кнігу Іздрыка, якую можна набыць, а не шукаць па сябрах, але і вельмі цікавае выданне, працу двух перакладчыкаў, біпалярную інтэрпрэтацыю аўтара па-беларуску».

Набыць кнігу можна ТУТ.