Сярод самых папулярных аўдыёкніг сайта audiobooks.by - дзве кнігі ад Kamunikat.org!

2023-08-22 21:15

Сайт audiobooks.by вырашыў правесці апытанне сярод сваіх наведнікаў і выявіць самыя папулярныя аўдыёкнігі бугучага лета. Спёка дае шанец схвацца ў цень парку або кавярні з добрай кнігай, а фармат кнігі можа быць абсалютна розным... То чаму не аўдыё?

У Top 10 ад audiobooks.by трапілі дзве кнігі, выдадзеныя Фондам "Камунікат" - "У вайны не жаночы твар" Святланы Алексіевіч" і "Локісаў" Артура Клінава.

«У вайны не жаночы твар» — першая кніга дакументальна-мастацкай хронікі «Галасы Утопіі» . Досвед унікальнага спазнання духоўнага свету жанчыны, якая трывае нечалавечыя пакуты вайны.

«Галасы Утопіі» — пяць кніг, у якіх «маленькі чалавек» сам апавядае пра свой лёс. Гэта адметны жанр — шматгалосыя раманы-споведзі, у якіх з малых падзеяў складваецца вялікая гісторыя.

Перад чытачом — апошняя аўтарская рэдакцыя цыкла ў найноўшым беларускім перакладзе. Пісьменніца паводле свайго творчага метаду дапрацавала хроніку: скасавала цэнзурныя праўкі, далучыла новыя эпізоды, а таксама старонкі з уласнага дзённіка.

Кожны чытач знойдзе ў рамане "Локісаў" нешта блізкае: вострасюжэтны трылер, філасофскую прыпавесць, сацыяльную драму. А нехта пасмяецца да слёз з дакладнага адбітка бязлітаснай беларускай рэчаіснасці. „Герой нашага часу – хто ён? Чалавек з двайной ідэнтычнасцю? Асоба з другім, прыхаваным жыццём? Партызан? Пярэварацень? Палітык, які прамаўляе тое, што хоча чуць ад яго публіка, але ніхто дакладна не ведае, што ў яго ў галаве”.

Абедзьве кнігі маюцца ў вольным доступе на сайце Kamunikat.org і ўсіх яго люстэркавых адбітках!

Крыніца: Камунікат

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк