Свежы нумар «Дзеяслова»

2023-08-23 15:39

Выйшаў з друку чацвёрты нумар літаратурна-мастацкага часопіса “Дзеяслоў”. Ён даволі багаты на цікавыя матэрыялы і, як кажуць пісьменнікі, у ім ёсць што пачытаць.

Часопіс распачынаецца паэзіяй – новымі вершамі Васіля Жуковіча, Леаніда Дранько-Майсюка, Ціхана Чарнякевіча, Віктара Слінка і Маргарыты Аляшкевіч.

Дэбютуе на старонках “Дзеяслова” маладая паэтка Лусінэ Маскалюнец:

Страх –

Гэта я.

Проза парадуе чытачоў новым раманам Андрэя Федарэнкі “Сцэнарыст”, пачатак якога друкуецца ў чацвёртым нумары. З цікавасцю чытачы прачытаюць таксама празаічныя творы Уладзіміра Сцяпана, Валерыя Гапеева, Змітрака Кузменкі і Алега Дашкевіча.

У абсяжнай і размаітай панараме гісторыка-літаратурнага жыцця Беларусі XIX стагоддзя творчая постаць Антонія Эдварда Адынца (1804-1885) усё большую ўвагу звяртае сучасных даследчыкаў і перакладчыкаў айчыннай польскамоўнай спадчыны. Ірына Багдановіч у “Дзеяслове” пазнаёміць чытачоў у перакладзе на беларускую мову з падборкай вершаў Антоні Эдварда Адынца “Невядома што, або Рамантычнасць”.

Сяргей Шапран у сваім матэрыяле прыгадаў Генадзя Бураўкіна, Адам Глобус напісаў пра менскага жывапісца Леаніда Лапчынскага, Васіль Аўраменка – пра творчасць Уладзіміра Някляева, а Алена Лепішава напісала рэцэнзію на кнігу Насты Кудасавай і Святланы Дземідовіч “Побач”.

Сяргей Ваганаў працягвае жыццёвыя згадкі “Шматкроп’і-III”, а на анкету дзеяслова адказвае Наталля Русецкая.

Вось такім разнастайным атрымаўся свежы нумар “Дзеяслова”, які з захапленнем прачытаецца і запомніцца.

Беларускае Радыё Рацыя

Крыніца: Беларускае Радыё Рацыя

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк