Нобэля ў галіне літаратуры атрымаў танзанійскі пісьменьнік Абдулразак Гурна

Нобэлеўскі камітэт прысудзіў прэмію ў літаратуры за 2021 год танзанійскаму пісьменьніку Адбулразаку Гурна за «яго бескампраміснае і спагадлівае пранікненьне ў наступствы каляніялізму і лёс уцекача ў прорве паміж культурамі і кантынэнтамі».

Пра гэта гаворыцца ў прэс-рэлізе Швэдзкай акадэміі.

Адбулразак Гурна нарадзіўся на востраве Занзыбар у 1948 годзе ў сям’і мусульман арабскага паходжаньня. У 1968 годзе, у сувязі з антыарабскімі настроямі на Занзыбары, пераехаў у Вялікую Брытанію, дзе працягнуў навучаньне. З 1980 па 1982 год чытаў лекцыі ва ўнівэрсытэце ў Нігерыі. У цяперашні час у званьні прафэсара ўзначальвае асьпірантуру на катэдры ангельскай мовы ў Кенцкім унівэрсытэце.

Піша на ангельскай мове. Аўтар раманаў:

Memory of Departure (1987),
Pilgrims Way (1988),
Dottie (1990),
Paradise (1994),
Admiring Silence (1996),
By the Sea (2001),
Desertion (2005),
The Last Gift (2011),
Gravel Heart (2017),
Afterlives (2020).

Летась літаратурнага нобэля атрымала амэрыканская паэтка Луіза Глюк, а ў 2019 годзе абвясьцілі ляўрэатамі Вольгу Такарчук з Польшчы (за 2018 год) і Пэтэра Гандке з Аўстрыі (за 2019 год).

У 2015 годзе Нобэлеўскую прэмію ў літаратуры атрымала беларуская пісьменьніца Сьвятлана Алексіевіч. Прэмія была прысуджаная «за поліфанічныя творы, помнік пакутам і мужнасьці ў наш час».

Першую Нобэлеўскую прэмію ў галіне літаратуры прысудзілі ў 1901 годзе францускаму паэту Сюлі Прудому.