- Kamunikat.org
- Бібліятэка
- Кнігазборы
- Калекцыі
- Іншае
Пра газ, Хамас і ні слова пра нас — так можна характарызаваць для беларусаў вынікі саміту краін Вялікай васьмёркі пад Пецярбургам. Наш „адвечны” спадзеў на дапамогу і вызваленне звонку, які перарос праз дзесяцігоддзі ў наіўную веру, стаў ужо неад’емнай часткай нацыянальнага менталітэту. Напярэдадні сустрэчы лідэраў васьмі краін, якая ўпершыню прайшла ў Расіі, прадстаўнікі беларускай інтэлігенцыі склалі адмысловы зварот да кіраўнікоў краін васьмёркі. У заходнія амбасады перадаць яго ўдалося без праблем. А вось усе тэлефанаванні і прыходы да расійскага пасольства не далі нічога — сівых прафесараў і жывых класікаў літаратуры, якія складаюць гонар Беларусі, папросту „футболілі” і ўрэшце параілі даслаць зварот-заклік поштай. Выснова простая — з прадстаўнікамі дэмакратычнай, культурнай, апазіцыйнай эліты сённяшняя Расія размаўляць па-сяброўску не будзе ні пры якіх абставінах. Не будзе яна падтрымліваць і тых палітыкаў, якія наўпрост заяўляюць, што пабудуюць з Расіяй лепшыя стасункі, чым цяперашні кіраўнік беларускай дзяржавы. Найяскравейшым прыкладам — суд над нядаўнім кандыдатам у прэзідэнты Аляксандрам Казуліным. (У. Хільмановіч, Самы сумны саміт, фрагмэнт)