«Нарошчваць патэнцыял супраціву трэба кожнаму»: фотарэпартаж з сустрэчы са Святланай Алексіевіч

16 чэрвеня лаўрэатка Нобелеўскай прэміі і ганаровая старшыня Беларускага ПЭНа Святлана Алексіевіч сустрэлася са сваімі чытачкамі і чытачамі ў Варшаве. Размова прайшла ў гасціннай тэатральнай прасторы, што стала магчымым дзякуючы суарганізатару падзеі Новаму Тэатру ў партнёрстве з горадам Варшавай і дзякуючы падтрымцы Шведскага Інстытута, які дапамог арганізаваць візіт Святланы ў Варшаву.

Гледачы запыталіся ў набеліяткі пра дзве абяцаныя кнігі — пра каханне і старасць. Святлана прызналася, што пакуль яны адкладзеныя:

«Што да кніг пра любоў і старасьць — яны адкладаюцца, бо ніяк не магу разабрацца з „чырвоным чалавекам“ — я павінна яго дапісаць і паглядзець, што з ім. Працоўная назва новай кнігі — „У чаканні новых варвараў“. Цалкам відавочна, што нас чакаюць цяжкія часы... Нарошчваць патэнцыял супраціву трэба кожнаму. Вучыцца ў моцных кніг, вучыцца ў моцных людзей».

Мадэравалі сустрэчу Таццяна Нядбай, беларуская літаратарка, перакладчыца, праваабаронца, старшыня Рады Беларускага дома правоў чалавека імя Барыса Звозскава і старшыня Беларускага ПЭНа, і Юстына Чэхоўска, польская перакладчыца шведскай і нарвежскай літаратуры, культурная дзяячка. Лаўрэатка ўзнагароды імя Віславы Шымборскай (2018), узнагароды Шведскай акадэміі для перакладчыкаў (2023).

На сустрэчы былі сімвалічныя для ПЭНаў «Empty Chairs» («пустыя крэслы») для тых, чый голас не можа, але павінен гучаць. Разам з намі ў залі сімвалічна былі Мікола Дзядок, пісьменнік і актывіст анархічнага руху, асуджаны на 5 гадоў зняволення, Уладзімір Мацкевіч, філосаф, метадолаг, эсэіст, публіцыст і грамадскі дзеяч, асуджаны на пяць гадоў зняволення, Максім Знак, адвакат, паэт, бард і пісьменнік, асуджаны на 10 гадоў зняволення, Кацярына Андрэева, журналістка і пісьменніца, асуджаная на 8 гадоў зняволення, і Алесь Бяляцкі, нобелеўскі лаўрэат, пісьменнік і праваабаронца, асуджаны на 10 гадоў зняволення.

Пасля сустрэчы Святлана яшчэ амаль паўтары гадзіны падпісвала кнігі сваім прыхільнікам у фае тэатра. Дзякуем усім, хто прыйшоў на імпрэзу, за ўвагу і шчырыя цёплыя водгукі.

Падчас сустрэчы Святлана адзначыла: «Зараз я запісваю людзей, якія ўдзельнічалі ў беларускай рэвалюцыі». І мы хочам шчыра падзячыць Дому спатканняў з гісторыяй і Старамейскаму дому культуры за прасторы, дзе для новай кнігі гучала праўда і нараджалася новая гісторыя.