Народная Воля 140-141/2006

Даеш рэферэндум! Беларускі прафсаюз работнікаў радыёэлектроннай прамысловасці (РЭП) плануе ў верасні падаць у Цэнтрвыбаркам дакументы на рэгістрацыю ініцыятыўнай групы па зборы подпісаў за правядзенне рэферэндуму па ўнясенні змяненняў і дапаўненняў у Працоўны кодэкс Рэспублікі Беларусь. Як паведаміў у інтэрв'ю БелаПАН кіраўнік прафсаюза РЭП Генадзь Фядыніч, гаворка ідзе пра адмену наяўнай сістэмы кантрактаў. Паводле яго слоў, чакаецца, што ў групу па зборы подпісаў увойдзе прыкладна тры тысячы валанцёраў. Фядыніч зазначыў, што ініцыятарам неабходна сабраць 50 тысяч подпісаў для правядзення рэферэндуму. Апрача таго, у Палату прадстаўнікоў Нацыянальнага сходу Беларусі будзе перададзены пакет прапаноў па змяненні Працоўнага кодэкса. Прафлідэр выказаў спадзяванне, што ЦВК зарэгіструе ініцыятыўную групу. Калі гэтага не адбудзецца, прафсаюз мае намер праводзіць гутаркі з рабочымі на прахадных прадпрыемстваў. "Рабочыя нас падтрымаюць", - перакананы Г. Фядыніч. Ён таксама зазначыў, што незалежныя прафсаюзы наогул не супраць кантрактнай формы найму, аднак лічаць, што яна не павінна быць прымусовай: работнік павінен мець права на скасаванне кантракта. Лідэр прафсаюза выказаў спадзяванне на тое, што "ўлады сядуць за стол перамоў з незалежнымі прафсаюзамі".

• Месца выхаду: Менск
• Дата выхаду: 2006-09-02
• Рэдактар: Сярэдзіч Іосіф
• Выдавец: УК "Народная Воля"
• Copyright: © 2008 by Народная Воля
• Кнігазбор: Kamunikat.org
• Дадатковая даведка: Выдаецца з ліпеня 1995 на беларускай і рускай мовах; Адрас рэдакцыі: 220030 Мінск, вул. Энгельса 34а; прыёмная: тэл./факс (017) 3286871; тэл./факс рэкламнага аддзела: 3286904, 3286906; e-mail: nv@promedia.by; http://www.nv-online.info Выданьне публікуецца тут за ласкавай згодай Рэдакцыі