Kamunikat.org на кніжным кірмашы ў Беластоку

2025-04-18 18:00

25-27 красавіка ў Беластоку адбудзецца Кніжны кірмаш, падчас якога запланаваныя і мерапрыемствы, датычныя беларускай літаратуры. На месцах 79-80 размесціцца салон незалежных беларускіх выдавецтваў, паведамляе Цэнтр беларускай культуры ў Беластоку. Арганізатары - Цэнтр беларускай культуры ў Беластоку i Фонд Kamunikat.org.

Праграма мерапрыемства анансуе аўтограф-сесіі, сустрэчы з аўтарамі і мноства беларускіх кніг.

25 красавіка (пятніца)

Салон незалежных беларускіх выдавецтваў

16.00 - аўтограф-сесія Міхала Андрасюка, кніга "Żubr" на польскай мове, першае выданне Цэнтра беларускай культуры ў Беластоку.

Міхал Андрасюк — аўтар шматлікіх апавяданняў і раманаў, які жыве ў Гайнаўцы і вёсцы Вoйнаўка на польска-беларускім памежжы. Піша па-беларуску і па-польску.

26 красавіка (субота)

Салон незалежных беларускіх выдавецтваў

11:30 - аўтограф-сесія Ганны Кандрацюк, кніга на беларускай мове "Проста з любові. Рэпарцёрскія партрэты памяці" (Цэнтр беларускай культуры).

Кніга - гэта сем партрэтаў незвычайных асобаў: Кастуся Каліноўскага, Ежы Папялушкі, святой Марыі (Петручук), Алеся Пушкіна, Юркі Гіля, Надзеі Артымовіч, Юры Гумянюка.

Ганна Кандрацюк - журналістка і пісьменніца з Падляшша. З 1993 года супрацоўнічае з тыднёвікам беларусаў у Польшчы “Ніва”.

Зал №2

12.30 - аўтарская сустрэча з сёлетнім лаўрэатам Ляйпцыгскай кніжнай прэміі еўрапейскага паразумення Альгердам Бахарэвічам.

Беларускі пісьменнік Альгерд Бахарэвіч прэзентуе сваю новую кнігу “Папяровы голем”, якая з’явілася ў выдавецтве "Янушкевіч" восенню 2024 года. Твор складаецца з лаканічных і правакацыйных тэкстаў пісьменніка, якія з’явіліся ў эміграцыі.

Салон незалежных беларускіх выдавецтваў, аўтограф-сесіі

13.30 - Альгерд Бахарэвіч, кніга "Папяровы голем"

14:30 - Цімур Кудзеліч, раман "Значныя дні".

15:30 - Андрэй Скурко.

16:30 - Зміцер Дзядзенка, кніга "Гульні Цырцэі"

27 красавіка (нядзеля)

Зал №2

10:30 - Сустрэча з класікам беларускай літаратуры і сябрам Праграмнай Рады Цэнтра Уладзімірам Арловым, які напісаў уступнае слова да кнігі ўспамінаў Ларысы Геніюш "Птушкі без гнёздаў". Выданні на беларускай і польскай мовах Цэнтра беларускай культуры і Фонда Kamunikat.org.

Ларыса Геніюш прайшла праз расстрэл бацькі, эміграцыю, пазбаўленне чэшскага грамадзянства, выдачу савецкім уладам, турму, допыты КДБ, ГУЛАГ. Пра яе нялёгкі лёс і выпрабаванні яна і згадвае ў сваёй кнізе.

Салон незалежных беларускіх выдавецтваў

11:30 - Уладзімір Арлоў

13:00 - Алесь Аркуш, двухмоўны паэтычны зборнік "Чаму праўда такая слабая?"

15:00 Aleś Bieły / Алесь Белы з кнігай "Самы цымус"

Таксама падчас Кніжнага кірмашу адбудзецца старт продажаў новай кнігі прозы Барыса Пятровіча "Цнота на потым" (Фонд Kamunikat.org).

У новую кнігу прозы Барыса Пятровіча ўвайшлі дзве аповесці і эсэ. Гэта захапляльнае падарожжа па пазнавальных краявідах Менска ды іншых гарадоў і мястэчак Беларусі, а таксама знаёмства з неардынарнымі асобамі, якія сталі героямі твораў.

У дні Кніжнага кірмашу адбудзецца сустрэча з Юліяй Цімафеевай пад назвай "Аўтапартрэт у выглядзе костачкі авакада". Вершы і размовы пра тое, адкуль мы, хто мы і куды мы ідзём.

26 красавіка, 19.00

Беларускі Хаб "Новая Зямля" / Białoruski Hub "Novaja Ziamla"

вул. Св. Роха 5, памяшканне 32, Беласток

Крыніца: Kamunikat.org

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк