Андрэй Янушкевіч: Колькасцю наведвальнікаў беларускага стэнда і продажамі мы задаволеныя

У Беластоку адбылася галоўная кніжная падзея года Падляшша – літаратурны фестываль «На паграніччы культур» і кніжны кірмаш. У кірмашы ўзялі ўдзел беларускія незалежныя выдавецтвы, якія мелі адмысловы павільён пад № 24.

Мы пацікавіліся ў выдаўца Андрэя Янушкевіча, якія кнігі карысталіся ў пакупнікоў найбольшым попытам.

– Самымі запатрабаванымі былі навінкі. Гэта вельмі радуе, значыць да людзей дайшла інфармацыя і яны цікавяцца новай літаратурай. Яшчэ ў суботу скончыліся экзэмпляры дзіцячага фэнтазі «Казік з каменнай горкі» аўтарства Алеся Кудрыцкага. Лічаныя асобнікі засталіся новай кнігі Валера Гапеева. Сталым попытам карыстаецца і нон-фікшн – успаміны рэпрэсаваных гарадзенцаў. І акрамя таго ў рэйтынг найлепшых продажаў уваходзяць ад выдавецтва Янушкевіч кнігі Альгерда Бахарэвіча, кнігі Джоан Роўлінг, кнігі Джорджа Оруэла, Хемінгуэя, Фіцджэральда. У цэлым колькасцю наведвальнікаў беларускага стэнда і продажамі мы задаволеныя.

Кніжны кірмаш працаваў тры дні – з 21 па 23 красавіка. Свае навінкі на кірмашы прадставілі і беларускія пісьменнікі – Уладзімір Арлоў, Міхась Андрасюк і Аляксей Кудрыцкі. Беларускім і польскім чытачам свае навінкі і вядомыя выданні прапаноўвалі выдавецтвы «Янушкевіч», «Гутэнберг», ARCHE, «Кнігаўка», Skarynyčy ды іншыя.

Беларускае Радыё Рацыя