Песня да 120-годдзя паэткі

Песня да 120-годдзя паэткі


Гродзенскі кампазітар Яўген Петрашэвіч напісаў песню да 120-годдзя Зоські Верас. Песня, на думку аўтара, найбольш гарманічна адпавядае асобе беларускай дзяячкі, з якой ён быў знаёмы і кароткі час вёў ліставанне.

- Мы мелі ліставанне, але я быў не зусім карэктным чалавекам і не заўсёды мог ёй адказаць, хоць яна пісала вельмі каліграфічным почыркам. Я меў грэх, які павінен быў адмаліць і адмаліў хіба гэтай песняй. Я шмат працаваў і шмат уклаў сваёй энергіі, каб ухваліць у песні менавіта яе вобраз як патрыёткі, як самаахвярнай жанчыны: “Да краіны сваёй закахана, ты з любоўю, надзеяй і верай, прысвяціла жыццё так аддана беларусачка Зоська Верас.”

Прэзентацыя песні на словы і музыку Яўгена Петрашэвіча плануецца ў гродзенскім музеі Максіма Багдановіча да Дня народзінаў славутай пісьменніцы, дзяячкі беларускага руху пачатку мінулага стагоддзя. Асоба Зоські Верас звязаная з лёсам Гродна. Яна – адная з актыўных удзельніц гродзенскага гуртка беларускай моладзі 1909-1913 гадоў.

Якуб Сушчынскі, Радыё Рацыя, Гродна

Крыніца: Беларускае Радыё Рацыя