Кандрацюк-Свярубская Ганна

Нарадзідася у 1965 годзе ў сям’і Яна і Мар’і (з дому Міхалевіч) у прыпушчанскай мясціне Кутлоўка, непадалёк мястэчка Нарва. Вялікі ўплыў на яе меў дзед Сцяпан — жывая крыніца казак, былляў і легендаў. У Кутлоўцы знаходзіцца 9-11курганаў з ІІІ-IV стагоддзяў. Тут жа захаваўся стары фрагмент Бельскай пушчы, вядомы як урочышча Ботвінуўшчына. Старажытны дух месца, пушча, навакольныя багны з ашаламляючым багаццем лекавых раслін спрыялі метафізічным практыкам.

— Калі я была малая, я думала, што ўсе самотныя жанчыны ў свеце займаюцца магіяй, — успамінае аўтарка “Царскай трызны”. — Я сама, будучы дзіцём, навучылася збіраць лекавыя расліны, каменні, рэчы ды стасаваць іх у хваробах. У маёй сям’і жанчыны замаўлялі зубы. Пачатковую школу закончыла ў Ласінцы. Пасля вучылася ў беларускім ліцэі ў Гайнаўцы. У 1984 годзе паступіла ў Варшаўскі універсітэт на адзяленне русістыкі і прыкладной лінгвістыкі, якое закончыла паспяхова ў 1991 годзе. Тэма магістэрскай дысертацыі: "Этыка і эстэтыка ў паэзіі Наталлі Арсенневай".

З 1993 года працуе журналісткай тыднёвіка “Ніва”, дзе вядзе рубрыку для дзяцей і моладзі “Зорка”.

— Час, у якім мне прыйшлося працаваць, паказаўся самым складаным у гісторыі газеты. Кожны год мы рэальна адчувалі пагрозу ліквідацыі. Нашыя крыніцы творчасці — беларуская мова і дабрыня — таксама высыхаюць у маланкавым тэмпе. Усякая пашана для слова і этнічнага сваяцтва страціла значэнне. Я пішу, бо адчуваю подых постіндустрыяльнай рэчаіснасці, дзе чутны і наш голас лясоў. Іду следам сваіх пушчанскіх прабабак. Усе мае рэпартажы-доследы, апавяданні, песні ў вялікай ступені маюць тэрапеўтычны характар.

Ганна Кадрацюк — аўтарка кніжкі пра забытага музыканта з Сакольшчыны Яна Тарасевіча — W stronę Tarasiewicza” (Беласток 2002 г. і другое выданне ў 2004 г.). У 2006 паказаўся яе аўтарскі кампакт-дыск „Журылася Катэрына”, на якім 13 старажытныя песні з яе роднай хаты і наваколля. Песні Ганны Кандрацюк паслужылі як музычная ілюстрацыя для фільмаў Яна і Бажэны Валенцікаў пра Белавежскую пушчу.

У 2007 г. выйшаў зборнік апавяданняў „Царская трызна”, метафізічны том, які сам па сабе з’яўляецца лірычна-магічным і грамадскім абласкаўленнем-заклінаннем смерці...

— Гэтая кніжка вызваліла мяне ад маніякальных думак пра смерць і канчыну, — прызнаецца аўтарка. – Я нарадзілася, дарастала і жыла ў яе змрочным ценю.

У 2013 годзе выдала кнігу на польскай мове "Białoruś. Miłość i marazm" (Fundacja Sąsiedzi). У 2017 годзе выйшла кніга "Па Прыпяці па Нобель" (Праграмная рада тыднёвіка беларусаў у Польшчы Ніва), якая ўвайшла ў лонг-ліст Літаратурнай прэміі імя Ежы Гедройца.

Ганна Кандрацюк апублікавала ў “Ніве” сотні літаратурных рэпартажаў з Падляшша, Беларусі, Украіны, Латвіі, Літвы, Малдовы, Славакіі, Канады, Вялікай Брытанні, Грузіі, Італіі. Яе творы перакладзены на польскую і англійскую мову.

Спявае, размаўляе і сніць на мове дзяцінства — на старажытным падляшскім дыялекце з Кутлоўкі.

Жыве ў Беластоку.

Кандрацюк-Свярубская Ганна. Выданьні

pdf djvu

pdf djvu

Ніва 1 (2121) 1997

тыднёвік беларусаў у Польшчы

«Ніва» — штотыднёвая газета, якая выдаецца на беларускай мове ў Беластоку. Газета была заснавана ў 1956 Беларускім грамадска-культурным таварыствам. Зараз яе выдае Праграмная рада тыднёвіка «Ніва». Газета асвятляе штодзённае жыццё беларусаў у Польшчы, дзейнасць грамадскіх арганізацый, друкуе матэрыялы... Болей »