Авантурнік Сімпліцысімус
фон Грымэльсгаўзэн Ганс Якаб Крыстофэль
Зачын
Гэта ёсць: Апісанне жыцця аднаго дзіўнага шалапута на імя Мэльхіёр Штэрнфэльз фон Фуксгайм дзе рыхтык і якім кшталтам Ён прыйшоў у свет што ён у ім пабачыў чаго навучыўся што спазнаў і ператрываў а таксама чаму ён з усім гэтым дабрахоць паквітаўся.
Адмыслова пацешлівая і няма ладу якая карысная чытанка.
Якую пераклаў з нямецкай мовы спадар Васіль Сёмуха з хутара Ясенца што каля Пружаное.
З агню, быццам фенікс, я нарадзіўся;Ляцеў у паветры, але не згубіўся;
Блукаў па вадзе і па сушы блукаў
І ў гэтых блуканнях вядомы ўсім стаў.
Пра рэдкія радасці, частасць бедаў
У гэтай кнізе я вам паведаў,
Каб мілы чытач мой на прыклад героя
Пазбыўся блазноты і жыў у спакоі