Залатыя дыскі беларускага рок-н-рола

Будкін Сяргей, Сьвярдлоў Павал, Жбанкоў Максім


Гурт KRIWI

1998. КРЫВІЦКАЯ АЎТЭНТЫКА

Альбом, зь якім праект студыі „Палац” зрабіўся цалкам самадастатковай музычнай зьявай. Пасьля сыходу клявішніка Юр'я Выдронка гурт пазбавіўся „фолькмадэрновай” стылістыкі, фактычна адмовіўся ад кампутарных эфэктаў і „мінусовак”. Пераход да эклектыкі найперш зьвязаны з прыходам у гурт гітарыста „N.R.M.” Піта Паўлава.

Круглова й Вайцюшкевіч папрасілі яго падыграць ім на фэсьце „Басовішча'98”. Там уласна й прайшоў першы канцэрт „залатога складу” „Крыві”. Альбом „За туманам” быў запісаны літаральна празь некалькі тыдняў пасьля знаёмства з Паўлавым. Гэты запіс цудоўным чынам спалучае тры музычныя „пачаткі” „Крыві”: акапэльны („На турэцкіх палях”, „Каліна”), электронны (напрыклад, другі трэк) і выкананьне рок-гуртом („Добры дзень”, „Агу, вясна”). Дзеля спробы апошняга да „Крыві” часова далучыліся вядомыя музыкі — бубнач Кірыл Шэвандо і басіст Валер Башкоў. Яны ўзялі ўдзел у запісу альбома й некалькіх канцэртах. Акром традыцыйных рок-н-рольных інструмэнтаў у альбоме выкарыстана шмат духавых — тут разгарнуў свой талент Зьміцер Вайцюшкевіч. Усю гэтую музычную рознакаляровую карціну дапаўняў гарлавы вакал Веранікі Кругловай.

За два тыдні з дапамогай гукаапэратара Аляксандра Марозава альбом быў „даведзены да розуму” на студыі Белдзяржрадыё. Амаль усе песьні — народныя („Сьветлая Зоя” напісана Пітам і падпраўленая Зьміцерам Лукашуком). І без таго вядомая ў народзе „За туманам” пасьля гэтага альбома набыла проста шалёную папулярнасьць. У альбоме яна прысутнічае ажно ў двух варыянтах — акустычным і мэталічным(!). На другі пэўны гіт — „Агу, вясна” — быў зьняты кліп, які не сыходзіў з экрана тэлевізіі некалькі месяцаў.

„Крыві” знайшлі свой падыход да беларускай аўтэнтыкі. Цягам часу электронныя аранжыроўкі канчаткова сышлі ў нябыт, рокавае выкананьне таксама не прыжылося. Музыкі прыхіліліся да жывога выкананьня ў стыле world music, у аснове якога ляжаць фолькавыя імправізацыі. З гэтым альбомам „Крыві” журналісты ды крытыкі залічылі ў вышэйшую музычную лігу, а Круглова замяніла Касю Камоцкую на троне рок-каралеўны. Колішняе „адгалінаваньне” „Палацу” пры канцы 90-х станецца інтэрнацыянальным музычным праектам — у ім будуць граць музыкі зь Нямеччыны, Польшчы, Ізраілю, Ірану, Бангладэшу ды іншых краін сьвету.

ДЫСКАГРАФІЯ

1. „Хэй-лолі” (МС, 1995)

2. „За туманам” (МС, 1997)

3. „Людзям...” (CD, 1999)

4. „Мінск-Бэрлін” (CD, 2003)