Каталіцкі веснік 10 (127) 2021

Пантыфік лічыць галоўнымі аспектамі працы фармацэўта штодзённую руціну і “схаванае” служэнне. Гэта важна ў многіх прафесіях, дзе неабходныя цярпенне, настойлівасць і дакладнасць. Калі гэтыя рысы суправаджаюцца малітвай і любоўю, нараджаецца “святасць штодзённага жыцця”. Святы Айцец звярнуў увагу на важнасць прафесіяналізму бальнічнага фармацэўта, які разам з урачом “даследуе, эксперыментуе, прапануе новыя шляхі; заўсёды знаходзіцца ў непасрэдным кантакце з пацыентам”. Такая здольнасць разумець хваробу і пацыента часам вырашае самыя складаныя клінічныя сітуацыі. У гэтай прафесіі важна таксама этычнае вымярэнне, прычым у асабістым і грамадскім аспектах. У першым выпадку гаворка ідзе пра пастаянную ўвагу да жыцця пацыента. “І гэта ў некаторых сітуацыях прадугледжвае супраціў сумлення, што з’яўляецца не здрадай, а, наадварот, вернасцю сваёй прафесіі, калі ён слушна матываваны. Гэта асуджэнне несправядлівасці, учыненай супраць нявіннага і безабароннага жыцця”, – адзначыў Папа Францішак, маючы на ўвазе, між іншым, аборты. Этычнае вымярэнне ў грамадскім аспекце прадугледжвае сітуацыю, калі “стратэгіі аховы здароўя, накіраваныя на дасягненне справядлівасці і агульнага дабра, застаюцца эканамічна і этычна ўстойлівымі”.

• Месца выхаду: Віцебск
• Дата выхаду: 2021-10
• Рэдактар: Місевіч Віктар
• Copyright: © 2021 by Віцебская дыяцэзія Рымска-каталіцкага Касцёла ў РБ
• Кнігазбор: Kamunikat.org