Новы Час 42 (701) 2020

Ужо каторы нумар на першай старонцы «Новага Часу» вы маглі бачыць цудоўныя фотаздымкі нашых карэспандэнтаў. Але гэтым разам вы бачыце фота саміх журналістаў. Тры фотакоры «Новага Часу» — Дзмітрый Дзмітрыеў, Аляксандр Зяньковіч і Яна Трусіла — былі затрыманыя 1 лістапада. Затрыманыя, бо сумленна рабілі сваю працу. Стараліся зафіксаваць для вас, шаноўныя чытачы, і для ўсяго грамадства, дзеля гісторыі, нарэшце, тое, што адбываецца ў Беларусі. Зафіксаваць гвалт і нахабства тых, хто павінен абараняць народ і закон. Мужнасць і самаахвярнасць тых, хто больш не можа трываць беззаконне і тэрор. Яны працавалі смела і самааддана, як заўсёды. Як і ўсе сумленныя журналісты ў Беларусі. Але так і не здолелі здаць свае матэрыялы ў рэдакцыю. Іх затрымалі, адвезлі ў РУУСы, пасля — у ІЧУ на Акрэсціна, а 2 і 3 лістапада судзілі. Калі ў прынцыпе можна назваць судамі тое, што апошнім часам адбываецца ў памяшканнях судоў. Дзмітрый Дзмітрыеў атрымаў 10 сутак па арт. 23.34 ч.1 КаАП — «парушэнне парадку арганізацыі і правядзення масавых мерапрыемстваў», Аляксандр Зяньковіч — 13 сутак па арт. 23.4 КаАП — «непадпарадкаванне законным патрабаванням службовай асобы», 20-гадовая Яна Трусіла, якую затрымалі ўпершыню, — таксама 13 сутак па арт. 23.4. Вось такая разнастайнасць. Акрамя нашых фотакораў за кратамі застаюцца яшчэ 6 журналістаў.

• Месца выхаду: Мінск
• Дата выхаду: 2020-11-06
• Рэдактар: Колб Аксана
• Copyright: Прыватнае выдавецкае ўнітарнае прадпрыемства «Час навінаў».
• Кнігазбор: Kamunikat.org