Бастунец: Выглядае, Tut.by і Золатава ад пачатку былі галоўнай мішэнню

Бастунец: Выглядае, Tut.by і Золатава ад пачатку былі галоўнай мішэнню


Шмат пытанняў: юрыдычных і маральных. Так старшыня Беларускай асацыяцыі журналістаў Андрэй Бастунец рэагуе на суд над галоўнай рэдактаркай партала Tut.by Марынай Золатавай.

Яна адзіная абвінавачаная ў так званай «справе БелТА», каго чакае судовы працэс. Золатаву абвінавачваюць па ч. 2 арт. 425 Крымінальнага кодэкса („Бяздзейнасць службовай асобы”), санкцыя артыкулу – ад штрафу і да 5 гадоў пазбаўлення волі.

Андрэй Бастунец у нашым эфіры звярнуў увагу і на іншыя акалічнасці гэтай справы:

– Марына Золатава была адзіным фігурантам справы, якога не абвінавачвалі ў тым, што ён карыстаўся паролем БелТА. Яе абвінавачваюць у бяздзеянні службовай асобы. Вельмі шмат пытанняў да юрыдычнага боку гэтага абвінавачвання. Мы паслухаем як сваю пазіцыю будзе прадстаўляць бок абвінавачвання ў судзе. Але такое ўражанне, што Tut.by і Марына Золотава былі ледзь не галоўнымі мішэнямі ў гэтай справе ад пачатку.

Справа супраць галоўнага рэдактара Tut.by Марыны Золатавай 12 лютага будзе разглядацца ў памяшканні суда Маскоўскага раёна. Пачатак працэсу ў 10:00. Астатнія фігуранты па «справе БелТА» – 14 супрацоўнікаў розных СМІ – вызваленыя ад крымінальнай адказнасці з прыцягненнем да адміністрацыйнай. Акрамя штрафаў журналісты кампенсавалі прад’яўленую шкоду. Сумы розныя – ад 3 да 17 тысяч рублёў.

Улад Грынеўскі, Беларускае Радыё Рацыя

Крыніца: Беларускае Радыё Рацыя