Кніга прысвечана аднаму з найбольш драматычных момантаў беларускай гісторыі. На падставе шматлікіх крыніц паказаны падзеі лета і восені 1794 года, якія разгортваліся на землях Берасцейшчыны. Тут вырашаўся лёс не толькі нацыянальна-вызвольнага паўстання, узначаленнага Тадэвушам Касцюшкам, не толькі Беларусі і Польшчы, але і ўсёй Еўропы. У цэнтры апавядання – знакамітая Крупчыцкая бітва, якая адбылася 17 верасня 1794 года на землях сучаснага Жабінкаўскага раёна Брэсцкай вобласці паміж паўстанцкім корпусам генерала Караля Серакоўскага і расійскімі палкамі генерал-аншэфа Аляксандра Суворава. Апошні раздзел кнігі распавядае пра гістарычныя помнікі, што паўсталі ў вёсцы Чыжэўшчына (колішнія Крупчыцы) у напамін пра падзеі, што адбываліся тут звыш 210 гадоў назад. Напрыканцы падаюцца спісы афіцэраў – удзельнікаў згаданых падзей, колькасны склад паўстанцкіх аддзелаў, спісы архіўных дакументаў, што ўтрымліваюць звесткі пра баявыя дзеянні ў жніўні – верасні 1794 года.