Шаноўнае спадарства!
Ужо некалькі год карыстаюся "Камунікатам" і вельмі ўдзячная за вашую працу.
Але спраўды, можа неяк варта у прэв'ю кожнага выдання пазначаць, ці ёсць яно ў лічбавай форме. Многія карыстальнікі, асабліва патрапіўшы ў бібліятэку ўпершыню, шукаюць не праз акно пошуку канкрэтную кнігу, а метадычна гартаюць старонку за старонкай, каб паглядзець "што тут ёсць". І ўявіце сабе расчараванне такога карыстальніка, калі ён адкрывае адну старонку з кнігай, і бачыць там, што яна ёсць толькі у папяровым варыянце. Потым другую, трэцюю і г. д. Асабліва крыўдна, калі чалавек пры гэтым знаходзіцца ў другой краіне і ну ніяк не можа наведаць бібліятэку ў Беластоку.
Тым больш у вас гаворка ідзе і пра досыць рэдкія выданні, якія і ў Беларусі бывае не так проста знайсці.
Таму, на мой погляд, мэтазгодна было б нейкім чынам указваць у перадпраглядзе, ці ёсць кніга ў лічбавым выглядзе.
Дзякуй за ўвагу!!!

Шаноўныя госьці Беларускай Інтэрнэт Бібліятэкі kamunikat.org!
Вельмі прыемна бачыць Вас, ды ведаць, што наша праца прыносіць людзям карысьць і задавальненьне. Апошнім часам на сайце зьявілася шмат публікацыяў, якія не маюць лічбавай вэрсіі (магчыма, тымчасова). Гэта кнігі, якія ў папяровым варыянце можна знайсьці ў бібліятэцы Беларускага Гістарычнага Таварыства (Беласток, вул. Пралетарыяцкая, 11). Справа ў тым, што абедзьве бібліятэкі – КАМUNIKAT і BТH спалучаны паміж сабой, і часам варта ведаць дзе тую ці іншую кнігу знайсці, ды ведаць напэўна, што яна там ёсьць, каб на марна ногі не зьбіваць, ходзячы ад адной бібліятэкі ў другую. Таму і вырашылі мы разьмясьціць своеасаблівы электронны каталёг папяровых выданьняў зь бібліятэкі Таварыства.
Каб Вам, шаноўныя наведнікі, было прасьцей адшукаць патрэбную пазыцыю, ды не губляць час на гартаньне старонак, у меню „Бібліятэка” (зь левага боку сайту) ёсьць адмысловая кнопка „Пошук/Каталёг”. Праз яе можна свабодна ўвайсьці ў каталёг сайту. Упісаўшы ў рубрыку „шукаць” прозвішча аўтара або загаловак кнігі, праверце ці насамрэч шукаеце паводле аўтара ці загалоўка, зазначце які менавіта варыянт хочаце знайсьці, калі лічбавы – то ў рубрыцы „дзе” пазначце „КАМUNIKAT”, калі ж цікавіць вас папяровы варыянт то пазначце „BТH” і дайце каманду пошуку.
Для аматараў пэрыядычнага друку стварылі мы адмысловую катэгорыю „Пэрыёдыка” (кнопка ў меню), там сабраны газеты ды часопісы, дарэчы, шукаць іх можна таксама праз агульны „Пошук/Каталёг”.
Ёсьць яшчэ адна навінка – аўтарскія старонкі “Беларускія аўтары” (колькасьць іх пастаянна ўзрастае), тут не толькі знойдзеце інфармацыю пра аўтараў кніг зь Беларускай Інтэрнэт Бібліятэкі kamunikat.org, але ўбачыце і поўны каталог іх выданняў, нават калі гэта толькі артыкул у зборніку, ці публікацыя ў часопісе.
Беларускай Інтэрнэт Бібліятэкі kamunikat.org, як кожная сапраўдная бібліятэка, не абмяжоўвае сваіх магчымасьцяў і працягвае разьвівацца. Зьяўляюцца новыя выданьні, дапаўняюцца існуючыя. Мы стараемся зрабіць яе больш багатай і даступнай, каб кожны, хто завітае да нас, мог знайсьці тое, чаго шукае. Гэта бібліятэка для Вас, Шаноўныя Чытачы.
Дзякуем, што Вы час ад часу бываеце ў нас у гасьцях. Заходзьце часьцей, будзем рады.