Беларуская Рэдакцыя Польскага Радыё ў адным з конкурсаў для слухачоў паставіла пытаньне пра становішча нацыянальнае мовы ў беларускай дзяржаве. На конкурс адгукнулася вялікая колькасьць слухачоў.

У лістах слухачы найшырэй закранаюць праблему сёньняшняга становішча беларускае мовы, пішуць пра гістарычныя абумоўленасьці, пра значэньне нацыянальнае школы й добрых настаўнікаў, пра стан нацыянальнае сьвядомасьці, пра антынацыянальную палітыку ўладаў ды пра захопніцкія імкненьні Расеі. Задумоўваюцца таксама, што можна зрабіць дзеля зьмены сёньняшняга дрэннага становішча, дзеля павышэньня прэстыжу беларускае мовы й вяртаньня ёй належнае функцыі – шырокага выкарыстаньня ў якасьці дзяржаўнае мовы.